وان طال السفر / محمد عبدالماجد/ الماسورة بقت اسطــــورة/الثلاثاء 24 ديسمبر 2013

 

 

المأسورة البقى اسطورة

الثلاثاء 24 ديسمبر 2013 الساعة 2:27

< الهلالاب ديل عندهم قدرة (اقناع) عجيبة...حاجاتهم يرفعوها السماء..وحاجات الناس التانية ينزلوها الواطة.

 

< يدقوا بيها الدلجة.

 

< موش مرات في البيت وقت تجي راجع من الشغل ...(الحاجة) بتقول ليك عندي (بامية مفروكة) طاااعمة ، اعملها ليك.

 

< عارفك ما بتحب (البامية المفروكة)..عشان كدا من بدري بتعمل ليك (تمهيدي) اصلاح كدا..عشان تقنعك ان (البامية المفروكة) دي احسن حاجة.

 

< دي طريقة اقناع ...نحن بنسميها (منطق الحَلَة)...ومنطق الحَلَة دي اكيد في اي بيت...(امك) اي ملاح تعملو بتعمل المستحيل عشان تقنعك ان ملاحها دا طاعم.

 

< ان شاءالله (قرع).

 

< الحاجات دي بالمناسبة ما قاعد تطلع من فراغ...الاشياء دي برضو (علوم) ما تقعدوا تستهونوا بيها.

 

< اي حاجة في الدنيا دي عندها نظام وسر ...عشان كدا نحن بنقول ليكم الف مرة نحن اي حاجة عندنا بي نظام.

 

< انتوا ما بتسمعوا الكلام دا ..وبتقعدوا تتغالطوا.

 

< الهلالاب (شفوت).

 

< الهلالاب برضو عندهم سر باتع.

 

< ممكن بي باسطة يقنعوك الليلة (السبت).

 

< الليلة السبت ..وتأكيدا على الكلام دا ..امس كانت الجمعة...وبكرة الاحد كمان.

 

< انت مع المنطق دا...اكيد ح تقتنع ...تعمل شنو؟...في ناس كمان في الدنيا دي لو ما اقتنعت ليهم ..ببطلوا شغلهم ويصاقروك.

 

< اخير تقتنع ليهم وتتخارج في (البرد) دا.

 

< هو وينو البرد؟.

 

< انتوا صدقتوا ...الليلة التلاتاء يا جماعة..الواحد ما يهظر معاكم...سبت شنو كمان.

 

< الهلالاب شفوت ...الواحد لو كان بيأكل ليه في (فول) يدخلو ليك في نفسك...يشهيك الفول.

 

< الجماعة الشفوت ديل بتاعين حركات ..يدخلوا ويطلعوا ..وشيء بصلة ..وشيء طماطماية وشيء توم ..مع شوية موية جبنة كدا ...وجرجير من فوق كدا ...(والله الجنبك ما تديه).

 

< الهلالاب ديل ..وارغو الذي كان بيلعب في المريخ ، اقنعوهم ليك انه ما عندو شيء ..(هداف البطولة الافريقية وصاحب اعلى معدل اهداف فيها).

 

< المريخاب خلوا حكاية انو هداف البطولة الافريقية ...واقتنعوا ان وارغو ما عندو حاجة.

 

< وارغو ذاتو كورتو فكت في المريخ ...بقى ما عندو اي فرق من موسى الزومة.

 

< المريخاب من كلام الهلالاب بقوا يعاينوا لي وارغو عشرة ...عشرة.

 

< افتكروه (ماسورة).

 

< نغشكم نحن...الزول دا كان ماسورة بالجد جد.

 

< خلوه وارغو.

 

< تراوري دا موش كان بيلعب في الهلال ..تراوري الذي لعب في الموسم (12) شهر تلات شهور فقط في الهلال.

 

< الموسم كلو قاعد في بيتو.

 

< المريخاب عشان تراوري بيلعب في الهلال ..شافوه احسن لاعب في الدنيا.

 

< قاموا عملوا شنو؟.

 

< فكوا وارغو هداف البطولة الافريقية ..وسجلوا تراوري القاعد في بيتو.

 

< الناس ديل عندهم عقل.

 

< الناس ديل عندهم منطق.

 

< دا كلام.

 

< الناس ديل عندهم عقدة اسمها الهلال...واي حاجة يعملوها ناس الهلال او يشوفها في الهلال تعجبهم..والحاجة العندهم تطلع من نفسهم.

 

< زي (الفول) الكلمتكم عنو فوق.

 

< هسع تلقوا في ناس نفسها دخلت في (الفول).

 

< والله انا حافظهم حفظ.

 

< عشان ما تقولوا نحن بنتكلم ساكت...انا ح اقدم ليكم دليل تاني.

 

< الشغل دا كلو بالمنطق.

 

< المريخاب ديل كان عندهم الملك فيصل العجب ...الرجل الفضائي الزول الودانا غانا.

 

< بتاع المرجيحة ...(موش انتوا براكم الكنتوا بتقولوا كدا).

 

< العجب يا سلك ...(صباع المعجون)...انت نسيت يا سلك ولاّ شنو؟.

 

< الكلام دا جميل.

 

< اها صباع المعجون مرقها في الفاشر.

 

< الهلال كان عنده هيثم مصطفى.

 

< فيصل ما فيه كلام.

 

< وهيثم ما فيه كلام.

 

< ما قلنا شيء.

 

< لكن عشان ناس الهلال رفعوا هيثم مصطفى ...وهاجموا فيصل العجب وقالوا كبير في السن..قام نفسهم مرقت من العجب.

 

< بقوا يشوفوه زي وارغو عشرة ..عشرة.

 

< وعشرة العجب طبعا بتساوي 150 وارغو.

 

< تصوروا المريخاب عملوا شنو؟.

 

< شطبوا العجب المسكين وفكوه عكس الهوا ..(العجب رجع مارس كورتو ..يعني حكاية اعتزاله دا تاني ما تقولوها لينا).

 

< ما عاوزين نسمعها.

 

< شطبوا العجب ..وسجلوا هيثم مصطفى اكثر لاعب هاجموه وانتقدوه وهتفوا ضده في المساطب.

 

< شطبوا ولدهم ..وسجلوا ولدنا.

 

< اها دي ما عقدة.

 

< خلوني انا ..انسوني بعيد ..سيبوني ...انتوا بتقولوا شنو؟.

 

< المريخاب هسع مثلهم الاعلي في الدنيا (سادومبا).

 

< بحلموا في كل فترة تسجيلات انهم يجيبوا سادومبا.

 

< من قبل المريخ خلوا ولدهم (ايداهور) الذي سقط ميتا في ملعب المريخ ...وجروا على (كلتشي).

 

< شافوا ليك (كلتشي) زي القمر.

 

< اي حاجة في الهلال بتعجبهم حتى لو كانت (فول)...واي حاجة في المريخ نفسهم بتمرق منهم حتى لو كانت (سمك).

 

< وارغو دا ...قصتو قصة.

 

< اي واحد يلاقيني ليك ...يقول لي انتوا ما قلتوا ماسورة.

 

< ماسورة ...وماسورة ...وماسورة.

 

< لكن بنجح في الهلال.

 

< الهلال دا نجح فيه (افياني) ما ينجح فيه (وارغو).

 

< جمهور الهلال دا لو جبت ليه زول من الخلا ..ما بعرف رمية التماس من الضربة الركنية بنجح.

 

< غايتو يا الهلالاب ..الحاجة وقت تكونوا عاوزين تصلحوها ما بتتلفتوا.

 

< عندنا واحد (مكجن) ليه زول اسمو (عباس).

 

< ما بريدو..من تجيب ليه سيرتو بتلفت للناحية التانية.

 

< عباس دا عندو حمار ..لافي بيه اليوم كلو في الحلة اصلو ما بنزل من حمارو.

 

< صاحبكم الما بريد عباس جاء واحد من ناس الحلة سألو ..وقال ليه يا حاج ما شفت عباس بي حمارو جاء فايت بي هنا.

 

< قال ليه شفت (الحمار)..عباس ما شفتو.

 

< هسع الكلام دا دخلو شنو بي الحكاية دي.

 

< كيف دخلو شنو؟.

 

< انتوا بتسرحوا ولاّ شنو؟.

 

< وارغو دا الهلالاب شغالين (4) سنوات بقولوا الزول دا ما عندو حاجة ...الزول دا ماسورة.

 

< 4 سنوات ...الكلام دا ما اتغير.

 

< وارغو ذاتو من كترة النقة بقى (ماسورة)...والمريخاب ..اقتنعوا بالحكاية دي.

 

< براهم بقوا يقولوا ليك وارغو ماسورة.

 

< شفتوا وصلناهم وين من القناعة؟.

 

< اقتنعوا عديل كدا.

 

< الواحد بقى بدون مناسبة يلاقيك في الشارع ..ويقول ليك وارغو ماسورة.

 

< البضرب تلفون ..يقول ليك وارغو ماسورة.

 

< البرسل ليك رسالة يقول ليك وارغو ماسورة.

 

< اها الهلالاب الشفوت ..وقت المريخاب اقتنعوا بي انو وارغو ماسورة..مشوا جابوا وارغو...عشان شنو؟.

 

< عشان يقنعوهم ليك ان وارغو ما ماسورة.

 

< انتوا المريخاب ديل لعبة في ايدكم يا هلالاب.

 

< ابقوا ليهم على شيء واحدة.

 

< شنو تقنعوهم بي انو وارغو ماسورة ..يقتنعوا بالكلام دا..تقوموا تقولوا ليهم لا ..وارغو ما ماسورة ...وارغو (اسطورة).

 

< انتوا قايلين المريخاب ما رجعوا اقتنعوا بي انو وارغو ما ماسورة.

 

< الامين العام بتاع المريخ الفريق طارق (الزول الزعلان من جوائز سوداني) طلع في التلفزيون وقال وارغو لاعب صغير في السن ..وسوف ينجح في الهلال.

 

< عليك الله في زول سألك.

 

< لو سمحت ابعد لينا من هنا ...(وارغو دا ما عندك بيه اي شغلة..اتكلم قدر قروشك).

 

< اتكلم عن (عنكبة) ..جايبنوا الساعة 12 عشان تسجلوه.

 

< هسع عنكبة دا عاوز ليه الساعة اتناشر.

 

< عنكبة دا لو عندنا نحن كنا سجلناه من تلاتة.

 

< اتناشر خسارة فيه.

 

< تلاتة ما بنزيدو دقيقة.

 

< الامين العام للمريخ خاف وارغو ينجح يقوموا الهلالاب ياكلوا لحمه...قام قال اخير يستبق الاحداث ..ويأكد نجاح وارغو في الهلال.

 

< شكرا يا اخوي.

 

< اقول ليك حاجة يا سعادة الفريق...جوائز سوداني كلها الموسم القادم ح يشيلها وارغو.

 

< اها ح تعمل شنو؟.

 

< ح تصرف كيف؟.

 

< احسن لاعب وسط وارغو.

 

< احسن مهاجم وارغو.

 

< هداف الدوري ..وارغو.

 

< احسن مدافع وارغو.

 

< احسن حارس مرمي وارغو.

 

< احسن لاعب صاعد وارغو.

 

< انتوا جوائزكم دي جوائز ...وارغو ح يلقطها كلها.

 

< اقول ليك حاجة ..جائزة احسن جمهور ذاتها ح يشيلها وارغو.

 

< الامين العام لمجلس المريخ ما براهو.

 

< ودالشريف امس في صحيفة الدار كتب عن وارغو برضو ..وقال : ( وارغو موهبة كروية فذة اخطأ مجلس المريخ كثيرا في شطبه وكان مؤلما ان شطبه جاء بعد ان بدأ في التألق).

 

< الجماعة خلوا بايرن ميونخ ..وقبلوا على وارغو.

 

< يا جماعة الزول دا عليكم الله ما تشغلوه لينا ...خلوه يلعب كورتو ...وارغو دا جاء عشان يستمتع بالهلال.

 

< في واحد زعلان.

 

< زعلان زعل شديد.

 

< النوع الما بشوف قدامو من الزعل.

 

< قال لي كرت وارغو جبتوه من وين؟...الزول دا ما عندو نادي.

 

< قلت ليه جبناه من (مصفاة الجيلي).

 

< زول ماسورة يعني ح نجيب ليك كرتو من وين؟.

 

< ناس مصفاة الجيلي لو ما رسلوا لينا (الكرت)..بنقوم كمان نستخرج ليه كرت من المنقطة الصناعية.

 

< زولكم اتكيف كيّف شديد.

 

< اتبسط في الدينا دي جنس انبساطة ..تقول حولت ليه رصيد.

 

< ملحوظة : وارغو شاهدوا النسخة الجديدة له.

 

هوامش 

 

< الامين العام للمريخ الفريق طارق ...طلع تصريح منع فيه لاعبي المريخ واعضاء الجهاز الفني من التصريح للصحف او الفضائيات.

 

< حتي في دي لاحقننا.

 

< الكلام البقول فيه الامين العام للمريخ الان ..قاله الامين العام للهلال قبل 72 ساعة.

 

< هسع الامين العام للهلال كان منع التمارين.

 

< صاحبكم (الزعلان من الجوائز) بطلع قرار يمنع فيه لاعبي المريخ من التمارين.

 

< الحبيب مامون ابوشيبة قال ان تراوري سجّل خصيصا لردع محمد عبدالماجد.

 

< اقول ليكم حاجة ...نحن كمان سجلنا وارغو عشان نثبت ليكم انو ما ماسورة.

 

< عاوزين نشوف الماسورة وين؟.

 

< لو نجح وارغو في الهلال ..سيؤكد ذلك ان الماسورة في حتة تانية.

 

< يعني يا المجلس يا الاعلام ..يا الجهاز الفني يا لاعبي المريخ كلهم.

 

< بالمناسبة يا ابوشيبة نحن هجومنا كلو راجمات ...واصحاب اجسام قوية (طول وعرض)...كوليبالي وكاريكا والجزولي وبكري المدينة.

 

< انتوا هجومك يا ابوشيبة ما فيه زول بصارع.

 

< اي لاعب في هجوم المريخ طوله 162 سنتمتر.

 

< اوليفيه 142 سنتمتر طبعا.

 

< هجوم المريخ ..هجوم مسالم.

 

< هجومكم دا في الولايات ...إلا تساعدوه من بدري بالحكام.

 

< هو براهو ما بجيب ليكم شيء.

 

< اوليفيه وعنكبة وتراوري والاثيوبي بيكيلي.

 

< كمان الاثيوبي بيكيلي دا حكايتو حكاية.

 

< تقول سجلوه من فرقة اثيوبية موسيقية.

 

< الزول دا مالو مسكين كدا.

 

< قالوا ليك لمن جابوه عاوزين يسجلوه ..جاء شايل ليه (زهرة).

 

< جنس مسكنة.

 

< بكرة ان شاءالله نتلاقى في صفحة من الغلاف للغلاف.

 

< الهلال بي طريقتو دي ..بخلينا نكتب تاني كل يوم من الغلاف للغلاف.

 

< الشغل دا عمود ما بمرقو ليكم.

 

< عاوزين نبهلها.

 

< بالمناسبة افتقدنا في هذه الايام الجميلة كتابات رمضان احمد السيد وخالد عزالدين.

 

< حقا اعلام الهلال افتقد رمضان وخالد.

 

< ان شاءالله نطالع كتاباتهم قريبا.

 

< الهلال يحتاج لتلك الآراء ...ونشتاق نحن اليها.

 

< ......

 

< عاجل :
وليد علاءالدين عمرو (18) سنة ..ولقط جوائز سوداني كلها..دي نيمار ما عملها.