وان طال السفر/ محمد عبدالماجد / الجزولى كان تجيبوه بالطيارة..أو اقعدوا انتظروا كرتو

الأحد 22 ديسمبر 2013 الساعة 1:56 

 

< هلالابي فرحان شديد..الفرح ظاهر في سنونو زي (الخضرة)..قال لي (الكرت) وصل؟.

 

< قلت ليه كرت شنو؟..المرة دي (كروتنا)..زي موية رمضان وصلت من بدري.

 

< زمن صلاح ادريس نقعد ننتظر (الكروت) زي السيرة.

 

< الكرت جا ..ما جا ..جا ..لمن جاتنا عقدة (كروت).

 

< الكرت تقول (عريس) ..وقت يصل نضبح ليه عديل كدا.

 

< هسع الحمدلله كروت المحترفين الاربعة كلها وصلت (شغل نضيف).. كرتو وصل - السيراليوني كرتو وصل - السنغالي سليمانو سيسيه كرتو وصل - المالي مامادو كرتو وصل.

 

< استديو بس ...(قولوا ما شاءالله)..براكم بتسحروا نفسكم يا الهلالاب.

 

< الكروت دي شكلها كدا فيها (هوبة).

 

< قالوا ليك ديفيد سيمبو عندو جنس (كرت).

 

< كرت يلعبو في الدوري الايطالي.

 

< الكروت وصلت.

 

< ما عندنا أي مشكلة...سيد اللبن لو دق لينا الباب نقول ليه : (الكروت وصلت)...مالك عاوز شنو؟ الليلة يا دوب يوم 22.

 

< الولد لو قام من النوم يكورك ..نقول ليه يا ولد في شنو؟..الكروت وصلت ارقد نوم ، نوم نومك.

 

< صلاح ادريس زمان كان بشتغل معانا على طريقة المسلسلات التركية.

 

< اول حاجة تصل (الشنط).

 

< تاني حاجة يصل الوكيل.

 

< بعد الوكيل يصل (وفد المقدمة).

 

< بعد وفد المقدمة يقوم يصل (فاكس).

 

< الغريبة نحن أي (وصلة) في الوصلات دي كانت بتفرحنا ..وتشقنا ضحك.

 

< من ثم يصل (اللاعب).

 

< اللاعب لمن يصل التسجيلات بكون باقى ليها (15) دقيقة.

 

< صلاح ادريس (شفت) كان بخمنا بالحاجات دي.

 

< اتذكر داريوكان وقابيتو ..نومنا ..صحينا الصباح لقيناهم وقعوا في كشوفات الهلال.

 

< جوا في انصاص ليالي وبرد...عربية الاسعاف ما بتجي في وقت زي دا.

 

< زمان (السيستم) بكون في اخر يوم فاتح للصباح زي الحفلة..المهم اللاعب يصل قبل ما تشرق الشمس.

 

< بعد اللاعب ما يوقع كان (كرتو) عاوز ليه (21) يوماً ..تقول بصل عن طريق بورتسودان عبر الميناء البحري.

 

< اللاعب لمن اجراءات قيده في الهلال تكتمل تكون فترته في الهلال باقى منها (14) يوماً.

 

< غايتو صلاح ادريس في (الكروت) كان متحاسب فينا.

 

< ويا ريت لو وقفت على كدا ..تتخيلوا الهلال إلى الان بدفع في قروش كرت (يوسف محمد).

 

< تقول كرت كاظم الساهر.

 

< باري ديمبا ...جاب زوجتو للهلال عشان تستلم حقوقه ...وهو ذاتو جاء عشان يلعب في اهلي شندي.

 

< ديل غنوا غنا من السودان.

 

< المهم كنا متلتلين تلتلة شديدة في حكاية الكروت دي.

 

< مجلس الهلال الان واضح انه شغال على (موية بيضا)..عشان كدا الكروت وصلت خلال 48 ساعة وبعضها وصل في يومو.

 

< نحن زمان كنا فاكرين الكروت دي بتمر اول حاجة بي الجوازات ثم تذهب إلى ادارة الجنسية ..ثم الداخلية وترفع بعد هذا لوزارة الخارجية.

 

< ثم تمشي ادارة السجون...ثم ادارة حماية الحياة البرية.

 

< ثم ترجع للخارجية تاني ..الخارجية ترفع الموضوع للبرلمان ...البرلمان كالعادة عاوز ليه (21) يوماً اجتماعات عشان يقرر في الامر.

 

< بعد كدا يرسلوا (الكرت) بي لوري تراب للسودان.

 

< الكرت لمن يصل يكون روحو طلعت.

 

< في ناس شفوت (الكرت) القافل عليه ما بفكوا ليك..بعرفوها ..تشمو قدحة.

 

< المريخاب طبعاً كان بستغلوا الاوضاع ..وقت الكرت يتأخر شوية ..يقولوا ليك النادي الذي كان يلعب فيه المحترف ما موافق.

 

< وناس مزمل ابوالقاسم يدوروا ليك في (الوكلاء)..كل يوم يطلعوا ليك (وكيل) جديد للاعب.

 

< الموضوع لمن يصل للمحامي الفرنسي ..زي ما كان في قضية تسجيل كلتشي في الهلال.

 

< هسع مجلس الهلال حسم ليك موضوع الكروت دي...اللاعب قبل ما يطلع من اكاديمية كورة القدم ..كرتو يصل.

 

< المريخاب طبعاً حاولوا يشرعوا لينا المرة دي في (كرت) وارغو.

 

< قالوا النادي الذي كان يلعب فيه وارغو..لم يخطر بانتقال وارغو للهلال ..وقالوا لينا النادي ذاتو ما موافق على الكلام دا.

 

< قبل ما يتموا كلامهم ...كرت وارغو وصل.

 

< اصحابكم ما عرفوا يمشوا وين؟...ما عرفوا يقولوا شيء؟.

 

< اها يا ربي كرت وارغو دا وصل من (سوق الشجرة) في ابوروف.

 

< المريخاب وقت لقوا (الكروت) كلها وصلت..عارفين عملوا شنو؟.

 

< قبلوا ليك طوالي على أحمد بيتر.

 

< قالوا احمد بيتر عندو اسم تاني...وخلوا ليك ناس العباسية يمشوا المحكمة.

 

< وقت لقوا احمد بيتر براهو ما بحلهم ..قالوا تسجيل يونس حارس النيل الحصاحيصا في الهلال ذاتو ما صاح.

 

< نحن عذرناهم ...جماعتكم ما لقوا طريقة في (الكروت) قبلوا على احمد بيتر.

 

< احمد بيتر بحلكم.

 

< كرت سيدي بيه طبعاً قاعد في الاتحاد ...(اعادة قيد) الموضوع ما عاوز ليه أي مراسلة أو طلب افادة.

 

< يعني أي حاجة في السلام ...ما عندنا أي مشكلة.

 

< يونس واحمد بيتر في (الرديف) ...خليناهم كدا عشان تقزقزوا بيهم.

 

< عاوزين نشغل بيهم المريخاب.

 

< المريخاب ديل لازم ينشغلوا بي حاجة ..ما بعرفوا يقعدوا ساي.

 

< اها زولكم بعد الشرح دا ...لف ودور وتاني جاء وقال لي (الكرت) وصل؟.

 

< قلت ليه يا زول ما قلنا ليك وصلوا.

 

< رجع تاني وقال لي كرت الجزولي وصل.

 

< قلت ليه الجزولي منو؟.

 

< قال كرت صلاح ابراهيم الجزولي وصل.

 

< قلت ليه دا كمان عملتوا ليه (كرت)..نجيب ليه كرت من وين من حديقة القرشي.

 

< زولكم غضب ..اعتبر الكلام دا استخفاف بيه ..قال لي انا بتكلم عن (كرت) الجزولي وصل.

 

< يا زول الجزولي ما عندو كرت ...الزول دا اتسجل بس بخطاب شطب من الخرطوم الوطني.

 

< قال لي ...الجزولي دا موش محترف اجنبي.

 

< قلت ليه قول ما شاءالله ..خلاص عاوزين تطقوا لينا ...الزول دا سوداني ..سوداني عديل ما زي ناس كلتشي وتراوري الجنسوهم بي (تلفون).

 

< صاحبكم ما صدق..معقولة الجزولي دا (وطني)...انا بعد الضجة دي ..وزعل المريخاب ديل (وعنكبتهم) افتكرت الجزولي دا محترف اجنبي...بعدين انا شفت اهدافو في سيكافا ..قلت الاهداف دي ما اهداف سوداني.

 

< يا ود الناس انت الجزولي دا موش شفتوا في سيكافا مع المنتخب ..كيف يعني يكون (اجنبي).

 

< والله الجزولي دا مفروض تشوفوا ليه (كرت)...الزول دا ما ساهل ان شاءالله كرتو تجيبوه من (المجلس الوطني).

 

< أو اقول ليك حاجة ..صلاح الجزولي دا مفروض تجيبوا (كرتو) من اتحاد المهن الموسيقية ..الزول دا (فنان).

 

< فنان عديل كدا.

 

< سكت ..ما قدرت اقول ليه شيء ..صاحبكم رغم انو في البداية كان ما فاهم إلا انه في النهاية (منطقني) ليك.

 

< اعمل شنو؟...الايامات دي (المنطق) حايم زي القرين.

 

< هسع (القرين) الدخلو في المنطق شنو؟.

 

< موش مرات الزول وقت يشوف ليه قرين بقعد (يتمطّق).

 

< دي العلاقة بين المنطق والقرين.

 

< بعد ما اتجاوزت موضوع كرت صلاح الجزولي دا...زولكم قال لي صلاح الجزولي اصلو ما كان يخلوا حكايتو تمر ساكت.

 

< يعملوا ليه شنو يعني يا ود الناس؟.

 

< كيف يعملوا ليه شنو؟...على الاقل صلاح الجزولي دا كان يجيبوه بي (طيارة).

 

< والطيارة تصل كمان الساعة اتنين صباحاً ...يعني (فجرًا).

 

< إن شاءالله تنزل في شارع واحد.

 

< أو تنزل في رأسك دا.

 

< عشان ناس احمد الحاج وابراهيم الجيلي يتلتلوا شوية..مسجلين صلاح الجزولي وما عاوزين تمشوا المطار تستقبلوه الساعة اتنين صباحاً.

 

< ناس المريخ ديل ذاتهم لو ما شافوا صلاح الجزولي وصل فجرًا لمطار الخرطوم ..الموضوع ما بقع ليهم.

 

< إلا يجيهم من المطار.

 

< نوع ديل بس تكافحهم الساعة اتنين (فجرًا)...زي وارغو.

 

< اها لو عملنا النظرية دي ...المريخاب كانوا ح يعملوا شنو مع (عنكبة).

 

< المريخاب طوالي كانوا مشوا بيه الميناء البري.

 

< في الميناء البري خلي معاوية الجاك ومحمد النصري يمشوا يستقبلوه.

 

< نحن لاعبنا صلاح الجزولي بنجيبوا بالطيارة ..وبعد ما يصل بالطيارة ح نقعد ننتظر (كرتو).

 

< انتوا قايلين صلاح الجزولي دا لاعب ساهل.

 

< فاكرنو (عنكبة).

 

< قالوا ليك عنكبة وقت المريخ كان عاوز يسجلو قالوا ليه ما عندنا خانة في الهجوم.

 

< قال ليهم ما مشكلة (باك) بلعب ليكم.

 

< شكلك كدا يا عنكبة ح تلعب في (مريخ الفاشر) قريب.

 

< ملحوظة : موسى الزومة وبله جابر وضفر لقوا ليهم رفيق.

 

هوامش 

 

< انتوا الامين العام لمجلس المريخ جاء بالانتخاب ولّا جابتوا الشركة الراعية.

 

< الزول دا مالو؟.

 

< الفريق طارق عثمان قال جوائز سوداني مفروض يفوز بيها الفريق الفاز بالدوري والكأس.

 

< انتوا مسرحية الدمازين دي صدقتوها ولّا شنو؟.

 

< يدوكم جوائز على ياتو اساس في كأس السودان.

 

< لّا يوزعوا ليكم (كراسات حساب) لفوزكم ببطولة كأس السودان ..عشان تتعلموا الحساب.

 

< قال جوائز قال.

 

< الزول دا هو قاعد يفرح بـ (الجوائز) دي.

 

< دا رائحة ليه (فرحة) ساكت.

 

< علماً أن سوداني الشركة الراعية للممتاز ما عندها أي علاقة بي كأس السودان.

 

< والامين العام للمريخ عاوز ليه جوائز ..من مباراة لعب فيها المريخ امام منتخب الدمازين الملقط من البيوت.

 

< بعدين يا استاذ انتوا مع (التمهيدي) بتاعكم دا مفروض جائزة (اسكراتش) بي خمسة ما يدوكم ليهو.

 

< انت ناسي انكم في (التمهيدي).

 

< مفروض الامين العام دا تدوه جائزة (المهاجم) الاول....لأن شغال (هجوم) بس.

 

< قايل الامانة العامة للمريخ يعني يهاجم الغير.

 

< مرة يهاجم الحكام ومرة الاتحاد ومرة الشركة الراعية ومرة الهلال.

 

< المضحك والذي يثبت أن الزول دا ما فاهم الموضوع صاح هو أن الفريق طارق هاجم شركة سوداني ثم عاد وشكرها لرعايتها للممتاز وتقديمها الكثير للكرة السودانية.

 

< دا ما عارف ذاتو عاوز يقول شنو؟.

 

< انت يا طارق الكلام (الاشتر) دا خليه لي ناس صديق علي صالح ..انت خليك للحاجات الاكبر من دي شوية.

 

< ما معقول زول يزعل عشان جائزة عبارة عن (موبايل).

 

< طيب انت يا الامين العام لمن تزعل ناس بله جابر يعملوا شنو؟.

 

< ناس عنكبة.

 

< عنكبة قالوا ليك اخطر من سعيد السعودي في اخراج الكورة من القون.

 

< انتوا التمهيدي دا عاوز ليه معسكر.

 

< وارغو المريخ لازم يكون عندو فرق من وارغو الهلال.

 

< وارغو المريخ كان بلعب (تمهيدي).

 

< .....

 

< عاجل : عكنبة دا مفروض يدوه جائزة افضل (عكنبة) في الدوري الممتاز...عشان ما في (عكنبة) غيرو...زي الزول البجي (الاول) في فصل فيه طالب واحد.