هلال 2014 وثرثرة المعالق والشاي الظريف
الأربعاء 1 يناير 2014
< مضى عام 2013م ..بكثير من الأحزان والاوجاع ..والقليل من الافراح.
< بعضها سقط من جبروت الحزن فينا ...وبعضها لم يصمد في ميدان دواخلنا إلا للحظات عابرة.
< وبقى الحزن ..يضرب بقياسات ...لها أن تهز اطراف شرق اسيا..التى اظنها تجاوبت مع هذا الذي فينا.
< على المستوى العام ...الهلال لم يحقق في هذا العام أي بطولة ..ولم
يصب أي نجاح ..رغم الرضا بما قدمه الهلال في ظل الظروف التى احاطت بالهلال.
< وفشل الهلال ..ينعكس على فشل عام ..وتراجع على مستوى المنتخب الوطني ..وعلى كل الاشياء في الوطن.
< نكاد أن نقول عام 2013م ..لم ينجح احد.
< احزان 2013م ...كانت حتى على نطاق الشخصيات العامة كبيرة ، وعظيمة
جعلت الحزن (شعور عام) ..بدأت احزاننا من محمود عبدالعزيز وانتهت عند محمد
حسين بهنس.
< رحيل محمود عبدالعزيز في بداية العام في الاردن لم يكن يختلف كثيرًا
عن رحيل بهنس في اواخر العام في مصر وهو يموت (متجمدًا) في ارصفة القاهرة
الباردة.
< جمع كل احزانه واوجاعه في جسمه النحيل ثم رحل (متجمدًا)..اثر الصمت
على الكلام ..ومتخيرًا التعفف على سؤال الناس ..أو حتى التوجع بصوت عال.
< مات بهنس هكذا (متجمدًا)...ساخرًا من احاسيسنا ...ومشاعرنا ...وهو ينعي احساس الناس بالغير ...وشعورهم بوجع الاخر.
< قبل بهنس ..كان رحيل محمود عبدالعزيز ...حكاية اخرى من الصمود والعبقرية الفنية والموهبة الفذة التى لم يحتملها جسده الشفيف.
< كلاهما رحل (محمود ومحمد) ..وخلّف وراءه كثبان حزن لا تنتهى.
< وفينا نحن من ويلات الوجع الخاص الكثير.
< على المستوى الشخصي ..احتفظ للعام الذي مضى بكثير من الوجع ..والحزن الممتد في بحور الايام الآتية والقادمة.
< أهم على كل نافذة في هذا الحزن أن تغلق حزناً ..واخشى أن تبلغ (العتمة) حتى بوارق الآمال الصغيرة في الدواخل.
< العام كان كتلة من الوجع المتعارض في الحلوق ...وكان شحنة من الحزن
المتغول فينا كما السرطان يفتك بضحيته سرًا ثم علناً، ثم يلقى به جثة هامدة
بلا حراك.
< يبقى في كل الأحوال الحمد والشكر لله على ما كان والرضا بما هو اتٍ.
< في عام 2014م ..نعشم في الكثير من الفرح ...وفي الكثير من الانتصارات
والبطولات والانجازات للوطن وللهلال ولكل الذين ينشدون النجاح..وينتظرون
الغد.
< حتى اخوانا في المريخ نتمنى لهم عاماً سعيدًا ..لا يخلو من (وصافة) الهلال في أي بطولة يوجد فيها الهلال بطلاً.
< نتوقع بإذن الله وتوفيقه عاماً سعيدًا للهلال..ونخرج في هذه المساحة
ونحن نحلم بهلال قادم بقوة...هلال بطل لكل بطولة يشارك فيها.
< اولاً اعود إلى العنوان الذي استلفته من رائعة محجوب شريف ...الذي
كما اشرت سابقاً اذا اردت عنواناً للشموخ أو الصمود أو قصدت عزة لهذا الشعب
وكبريائه فلن تجد غير محجوب شريف الذي شرّف هذا الوطن بكثير من القصائد
والكلمات التى تزين جيد الوطن فتجمّله أي جمال.
< العنوان اخذته من هذا المقطع (الشاي) الجميل لمحجوب شريف في رثاء عبدالكريم ميرغني (يابا مع السلامة).
جينا نقول نفرق نجي نلقاه مافي
لا سافر مشرق لا فتران وغافي
وين عمي البطرق جواي القوافي
يا كرسيه وسريرو هل ما زلت دافي
يا مرتبتو امكن في مكتبتو قاعد
يقرأ وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة
المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة أم سكر خفيف
ينده للبنية يديها الحلاوة
والخاطر يطيب
< مرثية محجوب شريف تلك ..اصبحت مرثية لي أي عزيز يرحل ..كل الذين
رحلوا لم يجد زويهم واصحابهم غير قصيدة محجوب شريف تلك ليعبروا بها عن
حزنهم.
< لا اريد أن اتحدث هنا عن محجوب شريف ...فهذا بحر ليس لنا حق الابحار
فيه اليوم ..ولكن صعب علينا أن نتجاوز محجوب ونحن نستلف عباراتنا منه
..ونعنون كل خطواتنا به.
< بعيدًا عن هذا الحزن ...ندخل لعام 2014 م ...ونحن مشرعين الكثير من الامال والافراح والاحلام الكبيرة.
< دعوني في هذه المساحة ...نختصر الحكاية على الهلال ..ولكم من بعد التمدد أبعد من ذلك ..كل يغني ليلاه.
< قالوا ليك هلال 2014 ..حاجة ما معقولة ..جهزوا (عممكم) من بدري وعلى الاستاد من الساعة واحدة.
< العندو (ولدو) يسوقو معاه ..ما تبخلو عليه بالفرحة.
< العندو صاحبو..يحجز ليه جنبو في المدرجات ..عشان لو مغربت ما بلقى ليه مقعد.
< الصفوف ح ترجع تاني ...الهلال يكون لاعب في أم درمان والصف حدو كوبري الحلفايا.
< التسيب من المدارس ..والزوقان من الحصة الاخيرة ..ودك المحاضرات في الجامعة ..ح تعود من جديد.
< الطلبة كلهم اتكسروا في استاد الهلال..عاوزين يتفرجوا ..ويفكوا على نفسهم شوية.
< عاوزين يشموا هوا.
< هوا نضيف.
< اتخيلوا سيدي بيه ووارغو (الماسورة) في تشكيلة واحدة.
< دي زي الاوركسترا الفيها محمدية وعربي.
< ح تتمتعوا في عمركم دا ...وح تشبعوا (فرحة).
< تاني شاي اللبن بدون ما تقننوه ..بتقنن ليكم.
< زلابيتو بره ..بدون ما تعملوها.
< هدف الهلال الاول دائماً بكون زي شاي المغرب.
< دي حاجة ما بتغالطوا فيها.
< سيدي بيه ووارغو (الماسورة) حاجة بتكون ما تخلص..الاتنين اخصائي (ون تو).
< ون تو لمن تفتروا.
< لمن تنشقوا من الفرح.
< ح تشبعوا (ون تو).
< سيدي بيه (ون)...ووارغو (تو).
< أو وارغو (تو)..وسيدي بيه (ون).
< ايوا وارغو (الماسورة)..انتو مالكم ..نحن بنصلحو.
< عصر (الون تو)..ايام حمد والديبة ح يرجع لينا تاني في الهلال.
< تاني أي واحد يدخل الاستاد شايل ليه (كيس وقفة).
< الكيس للون تو ...والقفة للاقوان.
< أقول ليكم ..تعالوا شايلين معاكم (شوالات).
< سيدي بيه ووارغو كورتهم (دقاق)...ديل تمريراتهم ناس ضفر لا بشوفوها ولا تغشوا نفسكم ساكت.
< نحن في التلفزيون لو ما عادوا لينا اللقطة (10) مرات ما بنفهمها.
< عاوزين (ضفر) يفهمها ليكم من اول (طقة).
< انتوا جنيتو.
< لو ضفر بفهمها ليكم كان لعب في (ليفربول)..البقعدو في البلد دي شنو؟.
< سيدي بيه ووارغو عاوزينهم في تشكيلة واحدة ..اوعكم تقولوا لي الاتنين بلعبوا في خانة واحدة.
< الكلام دا من هسع ما بنفع معانا.
< ختوا لينا (الجوز) دا في التشكيلة واسألونا من كأس العالم للاندية.
< والله ديل في 2014 ...السد العالي ما يثبتهم.
< قطر ما يوقفهم.
< سيدي بيه ووارغو الاتنين بتمتعوا بالايقاع السريع ..الواحد فيهم بلعب وبمشي يفتح في حتة تانية.
< اكيد وارغو وقت يلقى زول يفهمو زي سيدي بيه ح يفتح صاح.
< ح تشتهوا العافية يا مريخاب.
< النوم ح يطير من عيونكم.
< الثنائي دا اخطر من ثنائي العاصمة ...عشان بعدين ما تقعدوا تغالطوا ساكت.
< سيدي بيه ووارغو دا (جوز) مفاهمة براهو.
< نزار حامد ومهند الطاهر (جوز) غزلان بي غادي.
< الشغيل وعمر بخيت ..للتنضيف ..والتمشيط...(جوز) شفتنة.
< تاني عاوزين شنو يا هلالاب؟.
< الحكاية لو عصلجت بنجيب ليها (بشة).
< بشة دا بفتح بلف البترول ذاتو ..ما يفتح ليكم تكتلات الدفاع.
< موسى الزومة تصوروا إلى الان بشرب في الموية من (الجرية) الاخدها مع بشه.
< صاحبكم لي هسع نفسو مقطوع.
< الغريبة زولكم موسى الزومة إلى الان ما فاهم حاجة.
< ما عارف الحاصل شنو؟.
< كل ما يتذكر الهدف يمشي على التلاجة ..يقطع ليه جركانة موية.
< اها يا جماعة النص دا بتحلق.
< علماً أن الهلال في هذه التسجيلات جاب اخصائي الالعاب الهوائية وليد علاء الدين.
< انتوا جنيتوا.
< ناس ضفر ديل من الحالة دي اخير ليهم بايرن ميونخ.
< والله اهون عليهم بايرن ميونخ.
< الكلام دا لا بقدروا عليه..ولا تغشوهم ساكت.
< عاملين كدا زي غفير المدرسة الطلع الفطور.
< دا الوسط كدا.
< بكرة اكلمكم عن (الهجوم)..عشان رأس السنة.
< عندنا رأس حربة اخطر من رأس السنة.
< ملحوظة : غدًا يوم اخر.
هوامش
< نصرالدين النابي مدرب سوف يفيد الهلال كثيرًا ..على مجلس الهلال التعاقد معه واكمال العقد وعدم الالتفات للاصوات الرافضة.
< في الغالب أي مدرب جديد ..يلقى رفض.
< هذه اشياء اعتدنا عليها.
< المهم أن المدرب كبير ..واسلوبه سوف يتوافق مع اسلوب الهلال.
< النابي مدرب بعتمد على المهارات ...والمهارات في الهلال الان على قفا من يشيل.
< هذه المهارات أن لم تجد مدرب كبير ومنضبط وعنده شخصية وبطولات يمكن أن تكون خصماً على الفريق.
< لذلك خطوة التعاقد مع نصرالدين النابي خطوة موفقة.
< أهم من هذا أن يكون التعاقد اجله طويل.
< لا بد من جهاز فني مكتمل اذا اردنا أن نحقق بطولات.
< كذلك لا بد أن يكون الاعداد جيد ..والنظام هو الذي يحكم الهلال.
< تعيين اللوراء أحمد عبدالعاطي رئيساً للقطاع الرياضي ..هو قرار ايضاً موفق.
< كذلك كانت ضربة معلم تعيين عاطف النور (المتفق عليه) مديرًا للكورة.
< لأول مرة اجد (مدير كورة) في العالم متفق عليه بهذه الصورة.
< نتمنى التوفيق لعاطف النور ..وأن يكون قدر هذه التوقعات وهذا الدعم الذي وجده.
< ونحن نعرف أن عاطف النور جدير بهذا الدعم.
< .......
< عاجل : ناس الفريق طارق الأمين العام للمريخ مشوا اتفقدوا (ملعب) الخسارة بالتسعة ..(والله ديل عينهم قوية عديل كدا).
| روابط هذه التدوينة قابلة للنسخ واللصق | |
| URL | |
| HTML | |
| BBCode | |
0 التعليقات :
إرسال تعليق