ﻭﺇﻥ ﻃﺎﻝ ﺍﻟﺴﻔﺮ/ ﻣﺤﻤﺪ ﻋﺒﺪ ﺍﻟﻤﺎﺟﺪ/ ﺗﺘﺒﺮﻋﻮﺍ ﺗﺘﺒﺮﻋﻮﺍ ﻣﺎ ﺗﺘﺒﺮﻋﻮﺍ ﻧﻘﻄﻊ ﺭﺃﺳﻮ ﻧﺴﻮﻳﻪ (فرن) ~ صـحـيـفـة مـحـبي الـهـلال السوداني

ﻭﺇﻥ ﻃﺎﻝ ﺍﻟﺴﻔﺮ/ ﻣﺤﻤﺪ ﻋﺒﺪ ﺍﻟﻤﺎﺟﺪ/ ﺗﺘﺒﺮﻋﻮﺍ ﺗﺘﺒﺮﻋﻮﺍ ﻣﺎ ﺗﺘﺒﺮﻋﻮﺍ ﻧﻘﻄﻊ ﺭﺃﺳﻮ ﻧﺴﻮﻳﻪ (فرن)

:

mo7iby alhilal | 7:09 م | اعمدة الرأي

< يحكى عن أحد الأغنياء (النوع البفطر سمك وبتعشى سمك) أنه كان في البدء زول مرتاح وعندو قروش ..وما عندو أي مشكلة في الدنيا دي.

< مرطب اكتر من (المكيّف).

< الجلاكسيات قدامو زي (الكتاكيت).

< الواحد تلقى شايل ليه (جلاكسي) زي البطيخة.

< مرة لاقاني واحد في السلم بنزل بتصفح بي (اصبعو) في الرسائل في شاشة التلفون.

< قلت ليه مالك عامك كدا زي الزول البركب ليه في (ستائر).

< تجر في (الرسائل) زي الستارة.

< أو زي (الشباك) المعصلج وما بفتح.

< غايتو الناس اتعلمت ليها جنس (فلهمة)...تلقى الواحد مركب ليه (سماعات) في اضنينو..زي (الدلو).

< وداخل (واتس آب) والزول القاعد جنبو ما شغال بيه...ولا شاعر بيه.

< المهم دا كلو ما يصرفنا عن الزول (المرطب) ومرتاح ...وما عندو أي هم في الدنيا دي.

< أي حاجة ظابطة معاه...كل خميس بعلق ليه (خروف) في الباب...الحلة كلها تتفرج.

< الناس ..(زي أي ناس في الحلة، بتشوبروا) ..بقوا يدخلوا ويطلعوا في بيتو الزول دا ..ويقولوا ليه ..كدا ما ظريفة منك...لازم تعمل ليك حاجة لله.

< كدا ما صاح ...والحاجات البتعمل فيها دي غلط.

< زولكم (ناشف)..وصعب ..وما عاوز يطلع ليه حاجة لله.

< قرش ما بطلعو.

< عمارتو وقت يطلع الطابق العاشر ..بطلع بالسلم ..عشان ما يصرف (كهربة) بالمصعد.

< ناشف نشاف شديد ...نشاف (الداخليات) في آخر الشهر ...(عدس) ما بتلقى فيه.

< يا زول هسع (العدس) الدخلو هنا شنو؟.

< بس جنك تجيب سيرة (العدس).

< صاحبكم اسمو (عبدالمعين)...عبدالمعين دا عندو قروش كتيرة ..سيارات ...وبيوت ..وقروش ما ليها حد...وبضبح كل خميس.

< النار ما بتأكل قروشو.

< الناس زي ما قلت ليكم ..يدخلوا ..ويخشوا في (بيتو).

< يا زول طلع ليك حاجة لي الله.

< يا زول قروشك دي بتروح ساكت ...والموت من الحياة ما معروفة ..أعمل ليك حاجة تبقى ليك سند في (الآخرة).

< طلع ليك أي شيء.

< عبدالمعين صعب ..لو طلع ليه (قرش) يرجف زي القصبة ..تمسكو ليك (حمى) يبقى زي العود.

< اصلو ما بطلع ليه حاجة.

< بخل شديد.

< ناشف زي (شاحن الموبايل الما شغال)..تلكدو مية مرة عشان يشحن ليك ...تمشي منو تاني يقطع شحن.

< تقيف جنبو يكتب ليك (جاري الشحن).

< تبعد منو يقطع شحن.

< عبدالمعين عندو (ولدو) الكبير ..لمت فيه عربية كتلتو في الحال.

< الناس قالوا ليه ..دا (درس) ليك ..عشان ما بتطلع ليك حاجة للفقراء.

< قرش ما بتطلعو ..إن شاء الله موت ولدك الكبير دا يبقى ليك (موعظة).

< إن شاء الله يبقى ليك (درس).

< عبدالمعين ..اتأثر وحزن حزن شديد على وفاة ولدو ... (كتل) الحزن في قلبو وما قدر يقول أي حاجة.

< لكن برضو كان مقتنع أنو ما في علاقة بين الموت ..وبين أنو يطلع ليه حاجة في سبيل الله.

< شهر تاني ..عندو مصنع حرق.

< الموضوع حرقو.

< الناس قالوا ليه ..ما قلنا ليك طلع ليك حاجة في سبيل الله ..عشان الله يحفظ ليك قروشك.

< عبدالمعين حريقة المصنع حرقتو ليك حريقة شديدة ...أتأثر تأثير مبالغ فيه.

< حكاية أنو ما بطلع ليه حاجة في سبيل الله ..برضو حزّت في نفسو.

< شعر ليك بـ (احساس) داخلي كدا ...أنو مفروض يعمل ليه حاجة كدا يكف بيها عين الناس.

< لكن برضو حكاية أنو يطلع ليه (قرش) في سبيل الله ..باقية ليه (حارة).

< الموضوع ما واقع ليه.

< ما مقتنع في قرارة نفسو.

< أسبوع كدا ...ولدو الصغير طقتو ملاريا ..راح ليك فيها.

< موت ولدو الصغير ..جاب ليه الضغط ..والسكري وحالتو بقت زي البلاء.

< الناس قالوا ليه ما قلنا ليك يا عبدالمعين أعمل ليك حاجة لي الله.

< عبدالمعين الناس اكلو لحمو ..بقوا في أي حتة يلموا فيه يقولوا ليه أعمل ليك حاجة لله.

< الدنيا دي ما دايمة.

< والحياة من الموت ما معروفة.

< عبدالمعين وقت زهج من الكلام الكتير .. ولقى صحتو ماشه متدهورة قال يعمل ليه (جامع).

< عمل ليه (جامع) 12 نفر ما بشيلهم.

< جامع صف واحد بس .

< عبدالمعين ....سواة الجامع داخلة ليه في قلبو...لكن ما قادر يقول حاجة.

< طبعاً في ظل هذه الإحساس ..صاحبكم لا بد أن يتعرض لإمتحان ..واختبار قاسي.

< عبدالمعين ..قروشو كلها راحت ساكت ..انضرب ضرب شديد في السوق رغم حرصو الشديد.

< صاحبكم بقى كل يوم يبيع ليه عمارة.

< العربية الراكبها ذاتها باعها.

< عبدالمعين ...خلاص حالتو الاقتصادية ادهورت شديد ..واتراجع ..وبقى زول مفلس عديل كدا.

< بس يوم عبدالمعين قام يوم الجمعة الصباح ..وقال أنا ما استفيد من (الجامع) دا.

< عبدالمعين اليوم داك مشى صلاة الجمعة بدري...قبل ما الخطبة تبدأ.

< قعد في الصف الأول.

< أصلاً هو صف واحد.

< عبدالمعين انتظر الخطبة انتهت ...والصلاة انتهت ..سلم وقام طوالي استلم ليك (المايك).

< قال للناس السلامة عليكم يا جماعة ...ودخل ليك في الموضوع طوالي.

< يا جماعة طبعاً انتوا عارفين حالتي بقت صعبة ...وأنا ما عندي غيركم ..دحين عاوز أقول ليكم حاجة ...الجامع دا عملتوا أنا ..وبنيتو من قروشي دي.

< قام على كتوفي دي ...وأنا هسع بقى ما عندي قروش ...عشان كدا بقول ليكم اتبرعوا لي ...زي ما بتتبرعوا للعداد اتبرعوا لي أنا كمان.

< يا جماعة عاوز أقول ليكم حاجة ...تتبرعوا تتبرعوا ..ما تتبرعوا نقطع رأسو نسويه (فرن)...وهو يشير لمئذنة الجامع.

< الناس لملموا (شباشبهم) وقالوا دا شنو الزول المخلوع دا ..واتخارجوا من الجامع.

< هسع ناس المريخ ...ممكن يعملوا نفس النظرية...اقلبوه (فرن) وارتاحوا من الدوشة دي.

< جرايدكم الكتيرة دي اقلبوها (اجتماعية)...في الرياضة ما عندكم شيء.

< خسارة (كور) ساكت.

< جابوا محترفين ..ما خلوا ليهم (اجنبي) ما جنسوه.

< يجيبوا ويجنسوا.

< جنسوا ليهم (جالية) كاملة من النيجيريين.

< ولا شفنا حاجة.

< الناس ديل انطلقوا فينا من زمن علي النونو.

< النونو جابوه فوق الأربعين عاماً ...ما عمل أي حاجة ...جاء هنا (اتواصف) واتخارج.

< ما فهم أي حاجة.

< من أي حتة جابوا ليهم (محترف).

< من اليمن من العراق من مصر من فلسطين ...ما خلوا ليهم (حارس مرمى).

< الدول الافريقية بدأوها ليك من يوغندا القريبة دي لي مالي ونيجيريا والسنغال والكاميرون وغانا.

< ديل تصوروا (بلغاريا) ..مشوا جابوا ليهم منها (محترف).

< ما عمل أي حاجة.

< ويا ريت لو وقفت على (بلغاريا)..تصوروا ديل جابوا ليهم محترف من (البوسنة).

< البوسنة دي عليكم الله هسع (ريسيفر) بجيبو منها عشان اجيب لي منها (محترف).

< وعشان الزمن فات ..سجلوه في القاهرة.

< مجدي شمس الدين سافر ليه في القاهرة ..عشان (عمكم) نجاد كبير في السن ..وما بقدر على الحركة.

< طيب انتوا جايبنو لي شنو؟.

< جايبنو يمسك ليكم (الكشف).

< موش في البكيات اكتر زول (مسكين) وكبير في السن ..وحركتو بسيطة بمسكوه (الكشف)..ويقولوا ليه أنت بس أقعد أحرس لينا (الكراس) دا.

< الاتحاد العام ما خلى ليه (استثناء) للمريخ.

< ناس المريخ ديل سجلوا بي قاعدة من قواعد جامعة الدول العربية ..ما قلنا حاجة.

< وسجلوا بي قاعدة من قواعد الحريات الخمس.

< دخلوا السياسة في الرياضة ..والرياضة في السياسة ..بقينا ما فاهمين أي حاجة.

< ديل أي حاجة عملوها...الصاح والغلط.

< جابوا حارس من نيجيريا ..ما نفع.

< حارس من فلسطين ..ما نفع.

< حارس من مصر ..ما نفع.

< أي حاجة بتجي في خيالك ..ناس المريخ ديل عملوها.

< وبرضو بطلعوا من (التمهيدي).

< عملوا ليهم مقصورة ..ما نفع.

< عملوا ليهم طابق تاني..ما نفع.

< جبنا ليهم (مجاهد) القدال ..ما نفع.

< ريتشارد ..ما نفع.

< هيثم طمبل ..ما نفع.

< اديناهم هيثم مصطفى ذاتو ..ما نفع ..وأي محترف (نجح) في الهلال حولوه للمريخ.

< ما عملوا أي شيء.

< ولا حاجة في النهاية بطلعوا زي الأهلي عطبرة والنيل الحصاحيصا من المراحل الأولى.

< برضو بطلعوا من التمهيدي.

< منحناهم كأس السودان ..انسحبنا خصيصاً عشان ما عندنا مجلس ..ما استفادوا.

< طلعوا من دور الـ (64).

< أها عليكم في ظل هذه الأوضاع ..ما مفروض ..يطلع قرار وزاري ...يقطع (الرأس)..ويعملوه (فرن).

< عاملين لينا (زحمة) ساكت في شارع العرضة.

< غايتو نحن تاني (وصيف) بالشكل دا ما عاوزنو.

< شوفوا ليكم (وصيف) تاني.

< الوصيف دا ما بنفع مع الهلال.

< شوفوا لينا الأهلي شندي ...الأهلي عطبرة ..هلال كادوقلي ..يبقى (وصيف) للهلال.

< المريخ البطلع من دور الـ (64) ..مفروض يلعب في دار الرياضة أم درمان.

< دا استاد الخرطوم بي (نجيلتو) الصناعية دي كتيرة عليه.

< ملحوظة : هسع يوم الخميس ..نفرق مريخ الفاشر من مريخ أم درمان كيف في اللخبطة الحاصلة لينا في (العجب) دا.

هوامش

< مستوى شيلسي الغاني الذي لعب أمس أمام اطلع بره غير مقنع ...وإذا لعب معه الهلال مباراة ودية ..سوف يضلل الهلال ساكت.

< أحسن ما تلعبوا مباراة مع تشيلسي.

< أفضل أن تلعبوا أمام اطلع بره ..الذي لعب معه الهلال قبل أيام وتعادل معه.

< مستوى اطلع بره أفضل.

< بعد خروج المريخ من دور الـ (64) مفروض تراوري يشيل شنطتو ويسافر يمشي (مالي).

< بعد دا ما في زول محتاج ليه.

< لو المريخ احتاج ليك يا تراوري بيدوك (مسكول).

< الممتاز دا (عنكبة) كفاية عليه.

< ما في أي داعي لي (تراوري).

< بعدين زي ما بقول بابكر سلك (دلع) تراوري دا ورفيع اليدين في الدوري الممتاز ما بنفع معانا.

< تراوري عاوزين بيه شنو؟...إذا كان (ضربة الجزاء) بضيعها.

< يحفظ لهيثم مصطفى أنه ما لعب (تمهيدي).

< يا هيثم والله ...الله شافك من (تمهيدي) الجماعة ديل.

< مالك ومال الجرجرة دي.

< 17 سنة بتصل مرحلة المجموعات البلعبك (تمهيدي) شنو؟.

< مباراة الهلال يوم الخميس أمام هلال كادوقلي مباراة ما ساهلة.

< نصرالدين النابي يحمد له أنه تابع مباراة هلال كادوقلي أمام الخرطوم الوطني في الخرطوم.

< وأكيد النابي ..اكتشف هلال كادوقلي كويس ...وعرف مكامن قوتو ..ومكامن ضعفو.

< على جعفر مدافع المريخ ..ثبت أن الأهلي الخرطوم كتير عليه.

< الزول دا مالو؟.

< دا ثغرة جاهزة ...ما في ذلك شك.

< على محسن يوم الخميس أن يركز على ..علي جعفر ..فهو يمكن أن يخدمه أكثر من هجومه.

< ....

< عاجل : استاد الخرطوم تقول بقع في (الصين)...الاستاد دا أخطر علينا من الخصوم.

صحيفة محبي الهلال السوداني

روابط هذه التدوينة قابلة للنسخ واللصق
URL
HTML
BBCode