كروجر قال ليهم قفلوا بعد (التاسع)
الخميس 9 يناير 2014
< في اي مجتمع ...في اي حلة ..او دكان بكون في زول معروف بالهزار البايخ.
< لا بد انك سمعت بهذه العبارة : (هزارك بايخ).
< هذا مثل شأن الرجل الذي تلتقي به في مناسبة عامة فيستوقفك حوارا من اجل الحوار : (انا شفتك قبل كدا وين؟).
< في الغالب الاعم ..كل مداخل حواراتنا غير المعرفية تبدأ : (من شفتك وين؟).
< احدهم استوقف رجل صاحب (ضحكة) بلهاء..وبدأ يطرش عليه وابل من (انا شايفك وين؟).
< انا شايفك وين؟...الرجل كان يردد العبارة الف مرة ..مسترجعا شريط الماضي.
< قفز فجأة من الفرح ...وهو يستذكر ...ايوا ..ايوا ..ايوا ...اتذكرت ..شفتك في علبة (جبنة لباشكري).
< لكن دا ما موضوعنا ...موضوعنا الهزار البايخ.
< في زول كدا متفق عليه في اي حتة انو هزاره بايخ.
< الناس من تشوفو يقولوا ليك : (والله الزول دا عندو هزار بايخ بشكل).
< او الزول دا ..ما برتاح ليه (هزارو بايخ).
< لا يخلو مجتمع من زول هزارو بايخ.
< وصاحب الهزار البايخ...تجده لا يتخلى عن هزاره هذا في كل المناسبات وكل الامكنة.
< في الافراح تلقى بهزر ..في البرد تلقى بهزر ...في العرس بهزر ...وفي
المقابر نفسها ...تلقاهو بهزر في هزاره البايخ المعروف به.
< امثلة الهزار البايخ كتيرة ..ومسيخة.
< وعشان ما تقولوا الزول دا بتكلم ساكت ...ح اديكم نماذج من الهزار البايخ.
< مرات تكون قاعد (سارح) وما جايب خبر..يجي زول يضربك في ضهرك ..لمن تقع.
< نفسك ينقطع.
< تتلفت عشان تشوف (القطر) الضربك دا شنو؟...الزول يقول ليك : (وهـ).
< وهـ في عينك.
< تكتمتها في قلبك ..وتأكلها ..تعمل شنو عاد؟ ...الزول بهظر معاك ساكت.
< لكن مرات بتكون (قافلة) معاك من الصباح ..تقوم طوالي تدورها معاه.
< مية مرة قلت ليك هزارك البايخ دا ...ما تعملو لي.
< من الهزارات البايخة ..زول يلاقيك ..شايل ليك حاجة ..يقوم يخطف منك الحاجة دي ...ويحلف عليك إلّا تديه الحاجة دي.
< بغض النظر عن الحاجة ..هي ذاتها شنو؟..وعن احتياجه لهذه الحاجة.
< بس عاوز يشيل منك الحاجة دي والسلام.
< يعني ممكن يكون عندك (نضارة) عزيزة عليك ..يلم فيك واحد يخطفها منك ..ويرفض ريجعها ليك.
< يعمل الحكاية (هزار).
< ومن الهزار البايخ ايضا...تشيل (مفتاح) الزول تدسو ..او تخفي منو (الموبايل).
< تخلي صاحب المفتاح او الموبايل يفتش لمن عينو تطلع ..وقت الواطة تمغرب تطلع (الموبايل).
< في ناس هزارهم ابيخ من كدا ...الموبايل يدسو (4) يوم ..لمن صاحبو
يقنع ..ويقول خلاص الموبايل اتسرق ..ويبدأ في استخراج (شريحة) جديدة.
< في هزار بفقع (المرارة).
< بعض ناس عندما يكونوا في تجمعات عامة او في مناسبة ، فيها لمة ..في حاجات ومواضيع ما بحبو يجيبو ليهم سيرتها.
< برضو احترم خصوصية الزول ..وحريته في المواضيع التى لا يحب الحديث فيها مع العامة.
< في مواضيع الناس بضايقوا لمن تجيب ليهم سيرتها.
< يبقى من (الهزار البايخ) جدا ...ان تقول ليك لي زول كل ما تلاقيه مع مجموعة من الناس : (يا زول انت عاوز تعرس متين؟).
< والزمن ماشي ..وانت قايل نفسك صغير..وألحق نفسك.
< وتعمل فيها ابو عرام ..تقدم ليه مجموعة من النصائح والنظريات في العرس ..وتدعوه بغلظة للزواج.
< هذا طبعا ما يحلي ليك إلّا وقت يكون صاحبك وسط مجموعة من الناس.
< صاحبك وقت يزعل من كلامك دا ..تعملها ليه (هزار)..وتقول ليه : يا زول انت صدقت ...انا والله بهزر معاك ساكت.
< والله انا الكلام دا ما قاصد فيه اي حاجة ...وانت ذاتك لو ما زول اخوي انا ما بقول ليك الكلام دا.
< عليك الله لو ما بتهمني ..مالي ومالك ..ان شاءالله ما تعرس.
< لكن انت زول بتهمني...افضل ليك انا البقول ليك الكلام قدامك...احسن من اقولو وراك.
< وبنفس الطريقة ...ممكن تلقى ليك زول قاعد وسط مجموعة من الناس في مناسبة عرس ..ومعاهم (بنات) كمان.
< تقوم تقول للزول المقصود ..يا زول مالك بقيت كدا ..صلعتك وصلت (جبل اولياء).
< انت مالك ...ان شاءالله تصل جبل الرجاف.
< تصل في برطمانية من (روسيا).
< روسيا هسع الدخلها هنا شنو؟.
< ما في داعي للكلام دا.
< الغريبة الزول بتاع الهزار البايخ دا ..بكرر كلامو دا في اي مناسبة
من يشوف ليه زول (متحسس) قاعد ليه وسط مجموعة من الناس ..يسمعو الكلام الما
بحب يسمعو.
< مفروض يكون في مرعاة شعور.
< الازواج عادة ما بحبوا يجيبوا ليهم سيرة المرتب ..وبتصرف كم في الشهر قدام (المدام).
< في زملاء مهتمتم في الدنيا دي يقولوا فلان بصرف كدا للزوجة.
< كدا ما صاح.
< دا هزار بايخ لمن غلط.
< في (شفع) ما بحبوا تسألهم الاسئلة البايخة ديك...يا ولد جيت الكم في المدرسة؟.
< الواحد يكون جاء الـ (41)..ما يعرف يقول ليك شنو؟..وانت بتسألو وسط مجموعة من الناس.
< تعلموا الشفع (الكضب) بسبب اسئلتكم المحرجة دي.
< زمان السؤال دا كان بقولوه اعمامك الكبار وقت (الشفع) يغسلوا ليهم في المناسبات.
< عمكم ..عشان يبرر موضوع الغسيل ...وعشان يثبت فيه انه زول ظريف
..ويرفع الكلفة بقوم يسأل الولد : (يا ولد جيت الكم في المدرسة؟).
< هو ما عارف الطالب بضايق قدر شنو من السؤال دا؟.
< وفي ناس غسيلهم كتير...الواحد فيهم يكمل ليه (صابونة) في ايدو...وقصاد الغسيل دا طبعا في (ونسة).
< بتتفرع مواضيع كتيرة وبتكتر الاسئلة زي (الرز) ..انت ود منو؟...وبتقرأ في سنة كم؟...وعمرك كم سنة؟.
< ولو استمر الغسيل اكتر من كدا ..عمك ممكن يقول ليك : بتشجع الهلال وإلّا المريخ؟...ورأيك شنو في رفع الدعم عن المحروقات.
< شافع عمرو (12) سنة ..شن خبرو برفع الدعم عن المحروقات.
< اسئلة كتيرة ومسيخة.
< عشان كدا الزمن دا (الشفع) رفعوا ايدهم من موضوع الغسيل في المناسبات العامة.
< طشوا من البلد.
< اي زول يغسل براهو.
< وبيني بينكم (اعمامكم) ديل ..كلهم بجيبوها لي نفسهم.
< الحلة تلقى اشطر طالب فيها جاب في الانجليزي (4)...في داعي تسأل انت جيت الكم؟.
< اها هسع ..نهايتو كدا ...موضوع الهزار البايخ دا ..ح يعملوا (بارين ميونخ) للمريخ اليوم.
< الموضوع دا كلو ح تشوفوه الليلة الساعة تمانية.
< يعني (مالك اسحق) ابو قصة ...وقت يجي الليلة يغسل لـ (ريبيري) ايده قبل الهدف ..ريبيري بسأل مالك...اها انت يا شاطر جيت الكم؟.
< وكنت بتلعب وين يا شاطر قبل المريخ؟.
< وعمرك كم سنة يا شاطر.
< اما اكرم الهادي سليم فسوف يتخبط في ضهرو من روبن ...وقت اكرم يتلفت يلقى الكورة في القون.
< ويقول ليه : (وهـ).
< بايرن ميونخ دا هزارو تقيل.
< الالمان هزارهم زي الوحدات الاردني ..لا بعرفو ودي ...ولا بتفاهمو في حاجات زي دي.
< ديل شفوت.
< جنهم وجن (بلة جابر).
< بلة جابر الليلة لو قعد في الكنبة ح يقطع من اول خمس دقائق.
< ح يقطع من (البرد).
< هسع في زول جاب سيرة (بارين ميونخ).
< انتوا قايلين برد الدوحة ساهل كمان.
< برد الدوحة اخطر من برد الاردن.
< وانتوا عارفين (برد) الاردن عمل شنو؟.
< ما تقعدوا تتطيروا لي عيونكم كدا زي (الكراسي) المافي.
< اول الكراسي بطير عيونها.
< البرد دا تسعتو براهو ..غير تسعة بايرن ميونخ.
< انتوا شنو (التسعة) الماسك لينا فيها الايامات دي.
< ملحوظة : هي كان وقفت على التسعة ..كويس.
هوامش
< كروجر قالوا اجتمع بلاعبي المريخ ..قال ليهم تقفلوا بعد (التاسع).
< قبل التاسع ناس بايرن ميونخ ديل ولا بتفاهموا...ما تتعبوا ساكت.
< لو في لاعب من المريخ جاب ليه (كورنر)..في بارين ميونخ ..مفروض تكرموه.
< ناس جمال الوالي سافروا بي طيارة خاصة.
< لو ما ساي ..زول يسافر (قطر) بي طيارة.
< بعدين (التسعة) دي كان تسافروا ليها بي (بص الوالي).
< طيارة كتيرة على الكلام دا.
< مريخابي قالوا ليه الساعة تمانية تحب تسمع شنو؟.
< قال ليهم : (كان جنيت انا ما ملام) للفنان الكبير ود البكري.
< مريخابي الساعة تمانية إلّا ربع شاف ليه (كديسة).
< قال والله (الكديسة) دي بختها ...ما عندها اي هم في الدنيا دي ..لا بتعرف بايرن ميونخ لا بتعرف (بشه).
< مريخابي قالوا ليه المريخ لاعب (تمهيدي).
< قال ليهم وقت بلعب (تمهيدي)...الفلهمة شنو البتخلي يلعب مع (بارين ميونخ).
< مريخابي عمل ليه مخالفة كبيرة ...بوليس الحركة قال ليه (رخصتك).
< قال ليه : طيب افتح الـ (Bluetooth).
< الناس ديل بقوا يلخبطوا شديد.
< بلة جابر قالوا في معسكر الدوحة بفتش ليه لي شاحن (جلاكسي).
< قالوا ليه شاحن الجلاكسي عاوز بيه شنو؟.
< قال ليهم يمكن غوارديولا يسألني من الشاحن في اي لحظة من لحظات المباراة.
< برضو ثقافة.
< موسى الزومة ..والبعثة في طريقها الي ملعب السد لمواجهة بارين ميونخ ..قالوا ليه (وصيتك) الاخيرة قبل المباراة شنو؟.
< قال ليهم لو حصلت لينا اي حاجة اثناء المباراة ما تودوني (مريخ الفاشر).
< ضفر ..قال لي طبيب الفريق عندي (شد عضلي) في عيوني ..صاحبكم عاوز يتخارج.
< التأشيرة ما خارجتو.
< اكرم الهادي سليم قالوا ليه تفتكر المباراة ح تنتهي كم؟.
< قال ليهم لو كنت عارف كنت قريت طب.
< المباراة تمانية.
< تمانية وتلاتة دقائق ..ما عاوز اشوف لي اي مريخابي هنا.
< ابقوا رقاق.
< .....
< عاجل : التسعة ما كتيرة في البرد دا.
| روابط هذه التدوينة قابلة للنسخ واللصق | |
| URL | |
| HTML | |
| BBCode | |
0 التعليقات :
إرسال تعليق